Tiranë – Është identifikuar burri që u vra mbrëmjen e sotme në zonën e Babrrusë, Kamëz. Viktima është Hajdar Ismailgeci, 40 vjeç, i cili mbeti i pajetë pranë shkollës 9-vjeçare “Azem Hajdari”.

Ngjarja ndodhi rreth orës 20:10, kur trupi i pajetë i Ismailgecit u gjet në mes të rrugës. Sipas policisë, ai kishte marrë një plagë të rëndë me mjet prerës, e cila i shkaktoi humbjen e jetës si pasojë e hemorragjisë.

“Dyshohet se viktima u godit me thikë pas një sherri dhe humbi jetën pak minuta më vonë,” tha policia në njoftimin zyrtar.

Raportohet se autori i dyshuar, menjëherë pas ngjarjes, është parë nga banorët duke hyrë në një lokal rreth 300 metra më larg, me njolla gjaku në trup. Ai qëndroi për pak minuta dhe më pas u largua në drejtim të paditur.

Në vendngjarje ndodhet grupi hetimor, që po punon për të zbardhur rrethanat, dokumentimin e plotë dhe kapjen e autorit.