Njeriu kundër makinerisë… nuk është më thjesht një dilemë e kinemasë, por po shndërrohet në realitet. Në qendër të debatit është Tilly Norwood, një aktore e krijuar nga Inteligjenca Artificiale, e cila po bën bujë në rrjetet sociale dhe tashmë është në bisedime me agjenci talentesh, sipas krijuesve të saj holandezë.

Një “yll” i rremë në rrjetet sociale

Norwood është prezantuar si një aktore e re premtuese, duke publikuar fotografi profesionale dhe madje edhe një skeç komik. Pamja e saj ka bërë që shumë përdorues të mendojnë se bëhet fjalë për një aktore të vërtetë.
Megjithatë, Hollivudi nuk po i hap dyert. Përkundrazi, prania e saj është pritur me kritika të forta.

Sindikatat e aktorëve: “Po na vjedhin punën”

Sindikata e aktorëve, ku bëjnë pjesë emra të njohur si Emily Blunt, Natasha Lyonne dhe Whoopi Goldberg, e kanë cilësuar Tilly Norwood si një “karakter të rremë” të ndërtuar mbi punën e aktorëve të vërtetë.

“Ajo nuk është aktore, por një produkt i programimit kompjuterik, i trajnuar mbi performancat e palodhura të shumë artistëve profesionistë,” – theksojnë ata, duke ngritur shqetësimin se Inteligjenca Artificiale po rrezikon të marrë vendin e njerëzve në industrinë e filmit.

Hollivudi përballë një epoke të re

Debati mbi përdorimin e AI në kinematografi nuk është i ri, por rasti i Tilly Norwood është një sinjal alarmi. Për disa, ajo përfaqëson inovacionin dhe hapësirat e reja që teknologjia mund të krijojë. Për të tjerë, është një kërcënim real që zbeh vlerën e artit njerëzor.

E ardhmja e Norwood në Hollivud mbetet e paqartë, por një gjë është e sigurt: beteja mes aktorëve të gjallë dhe atyre të krijuar nga algoritmet sapo ka filluar.