Kupa e Botës 2026 po bëhet një makth për portofolët e tifozëve, pasi çmimet e biletave, të zbuluara së fundmi nga New York Times, kanë shkaktuar tronditje të madhe. Gara e ardhshme do të zhvillohet në Shtetet e Bashkuara, Kanada dhe Meksikë, por përballja me çmimet duket më e vështirë se kurrë.
Për fazën e grupeve, biletat më të lira fillojnë nga 52 euro (Kategoria 4), ndërsa ato të kategorisë më të lartë, Kategoria 1, arrijnë në 483 euro. Megjithatë, varësisht nga qyteti pritës dhe prania e një ekipi të popullarizuar, çmimet mund të rriten ndjeshëm.
Ndeshjet hapëse kanë çmime marramendëse: ajo e Los Angeles-it kushton 2.033 euro për Kategorinë 1, ndërsa ajo e Toronto-s në Kanada arrin në 1.415 euro. Çmimet rriten në fazat eliminatore, ku çerekfinalet mund të kushtojnë deri në 1.258 euro, gjysmëfinalet 2.069 euro, dhe finaleja në MetLife Stadium, Nju Jork, shkon deri në 4.740 euro për vendet më të mira. Edhe biletat më të lira të finales, Kategoria 4, kushtojnë 1.510 euro.
Një tifoz që dëshiron të ndjekë të gjitha ndeshjet eliminatore mund të shpenzojë deri në 2.232 euro në Kategorinë 4 dhe 9.224 euro në Kategorinë 1. Përveç çmimeve astronomike, organizimi komplikohet edhe nga oraret e vonshme, pasi disa ndeshje mund të luhen pas mesnatës për të shmangur vapën.
Kupa e Botës 2026 duket se po bëhet një luks i paarritshëm për shumë tifozë, duke shtuar tensionin dhe polemikën rreth mënyrës së organizimit dhe çmimeve të biletave.
