Policia e Shkodrës ka goditur një tjetër rast të kultivimit të lëndëve narkotike, në kuadër të operacionit të gjerë antikanabis të koduar “Koordinata”, i cili po shtrihet në të gjithë territorin e qarkut.
Gjatë kontrolleve të zhvilluara në 6 njësi administrative, forcat e rendit kanë gjetur dhe asgjësuar 4291 bimë të dyshuara narkotike të llojit Cannabis Sativa.
Sipas të dhënave zyrtare, në territorin e njësive Pult, Ana e Malit, Shosh dhe Shalë, janë asgjësuar 4107 bimë, ndërsa në Shkrel janë gjetur 60 bimë, dhe në Temal, 124 bimë të tjera.
Pas hetimeve të para, 5 kryetarë fshatrash janë proceduar penalisht për veprën penale “Shpërdorimi i detyrës”. Ata janë:
• L. L., kryetar i fshatit Nënmavriq
• D. V., kryetar i fshatit Pecaj
• P. Sh., kryetar i fshatit Gimaj
• N. M., kryetar i fshatit Abat
• P. S., kryetar i fshatit Lekaj
Burime nga policia bëjnë me dije se kontrollet po vijojnë me intensitet në zonat malore dhe të izoluara, ku tradicionalisht janë shënuar raste të kultivimit të kanabisit.
Forcat policore të Shkodrës, Malësisë së Madhe dhe Vaut të Dejës janë angazhuar në terren për të identifikuar dhe arrestuar personat përgjegjës për kultivimin e paligjshëm.
