Gazetari Sokol Bregu, i ftuar në emisionin “Të Paekspozuarit” në MCN TV, ka ndarë detaje të reja mbi sfondin e ngjarjes tragjike ku u vra gjyqtari i Apelit, Astrit Kalaja.

Sipas Bregut, autori i krimit, Elvis Shkambi, është rritur i ndikuar nga konflikti shumëvjeçar i familjes së tij për një pronë në Shkodër — një konflikt që nisi që kur ai ishte vetëm 5 vjeç.

“Autori ka qenë i ndikuar nga familja. Ishte 5 vjeç kur ka nisur procesi gjyqësor. Është rritur me idenë që ‘pronën time nuk ma japin’. Godina kishte 31 familje të strehuara që nga viti 1993, dhe i gjithë konflikti lindi nga vetë Bashkia e Shkodrës,” – u shpreh Bregu.

Gazetari theksoi se ky nuk është një rast i izoluar, por pjesë e një fenomeni që po përhapet në Shqipëri, ku konfliktet e pronësisë dhe mungesa e besimit te drejtësia po çojnë në raste ekstreme vetëgjyqësie.

“Besimi ndaj drejtësisë është në nivel zero. Të gjithë mendojnë se gjyqtarët janë të korruptuar, dhe kjo çon njerëzit në konflikte, sepse secili mendon se ka të drejtë. Kemi parë raste të ngjashme, si në Divjakë, ku një emigrant u kthye pas 6 vitesh dhe vrau për një konflikt prone të trashëguar nga familja,” – tha Bregu.

Ai shtoi se gjyqtari Astrit Kalaja ishte një ndër më të pastërtit në sistemin e drejtësisë dhe kishte kaluar procesin e vettingut pa asnjë problem, duke nënvizuar tragjedinë morale që shoqëron këtë ngjarje:

“Jemi përballë një fakti të rëndë, mes besimit të publikut dhe gjyqësorit. Ky gjyqtar ishte ndër më të ndershmit. Por sistemi i drejtësisë, sado i pastër, nuk mund të funksionojë në një shoqëri që nuk beson më tek ligji.”