Dionis Sota, turoperator dhe kryetar i Shoqatës Turistike “Arta”, është kandidati i parë zyrtar për kryetar bashkie në Vlorë. Sota, i cili garon si kandidat i pavarur, ka publikuar sot kandidaturën e tij në Facebook, duke përfshirë një thirrje për bashkëpunim me partitë opozitare dhe qytetarët për të mbështetur vizionin e tij për qytetin.

“Unë kandidoj me besim të plotë për një qytet ku çdo banor, nga qendra e Vlorës deri në fshatrat e Orikumit, Shushicës dhe Novoselës, të ndihet i vlerësuar. Një Vlorë plot motivacion, energji dhe dashuri pa ndasi apo armiqësi! Vlora është dhe duhet të jetë e para, dhe çdo vlonjat është një perlë e çmuar!”, shkruan Sota në postimin e tij.

Ai thekson se frymëzimi i tij vjen nga fëmijët, prindërit dhe gjyshërit, dhe shpreh shqetësimin për rënien e shpresës te të rinjtë që emigrojnë për shkak të mungesës së transparencës dhe keqpërdorimeve në qytet.

Mes prioriteteve të tij janë vëmendja e barabartë për të gjitha qendrat administrative të bashkisë Vlorë, përfshirë Vlorën, Orikumin, Qendrën e Vlorës, Novoselën dhe Shushicën. “Unë i njoh problemet e këtij qyteti dhe çdo fshat përreth dhe premtoj zgjidhje konkrete për secilën qendër administrative”, shton Sota.

Kandidatura e tij përbën një nisje personale, e cila, siç thotë ai, u lind nga shtysa e miqve dhe rastësitë e jetës, dhe synon të rikthejë qytetin si një vend të populluar dhe të gjallë për brezat e ardhshëm.