Një ngjarje e rëndë tronditi Foinikounta të Mesinisë në Greqi, ku dy burra – pronari grek i një kampingu dhe punonjësi i tij shqiptar – u qëlluan për vdekje me armë zjarri mbrëmjen e së dielës. Policia greke po vijon hetimet, ndërsa autori i krimit mbetet ende në arrati.

Sipas të dhënave zyrtare, sulmuesi ka hyrë në kamping me një skuter dhe ka qëlluar viktimat me pistoletë, pa lënë gëzhoja. Njëri prej burrave u vra brenda zyrës së kampingut, ndërsa tjetri u qëllua pas shpine teksa përpiqej të largohej. Një dëshmitar i mbijetuar, nipi i njërit prej viktimave, tha se autori kishte qëlluar edhe në drejtim të tij, por pa e goditur. Sulmuesi ishte i veshur me bluzë me kapuç dhe fytyrën e kishte të zbuluar.

Pamjet e kamerave të sigurisë tregojnë autorin duke u larguar me motor drejt fshatit Koryfasi, por targat e mjetit nuk janë identifikuar. Autoritetet po marrin në pyetje personat e afërt të viktimave dhe presin rezultatet e autopsisë, që u zhvillua në Korinth, për të sqaruar motivet dhe rrethanat e ngjarjes.

Hetuesit nuk përjashtojnë as motive personale dhe as skenarë më të ndërlikuar që mund të lidhen me interesa të tjera. Ngjarja ka tronditur komunitetin lokal dhe mbetet një çështje prioriteti për policinë greke.