Ngjarja e rëndë e vrasjes së gjyqtarit të Apelit, Astrit Kalaja, ka qenë në qendër të diskutimeve gjatë mbledhjes së Komisionit për të Drejtat e Njeriut, ku raportoi Avokati i Popullit.
Kreu i Grupit Parlamentar të PD-së, Gazment Bardhi, deklaroi se “as mafia italiane nuk ka guxuar të vrasë magjistrat në sallën e gjyqit”, duke e cilësuar këtë ngjarje si pasojë direkte të klimës së sulmeve publike që, sipas tij, kryeministri Edi Rama ushtron ndaj gjyqtarëve dhe prokurorëve.

“Qytetarët kanë marrë zemër nga Edi Rama, që çdo ditë ‘vret’ me fjalë gjyqtarët dhe prokurorët e Republikës vetëm pse japin vendime kundër shtetit, edhe pse në 95% të rasteve vendimet janë pro shtetit,” – tha Bardhi.

Ai shtoi se mungesa e sigurisë në gjykata dhe heqja e policisë nga ruajtja e institucioneve të drejtësisë kanë krijuar terren për ngjarje si ajo e 6 tetorit.

“Është bërë si han pa porta Apeli. Nuk dihet kush hyn e kush del. Policia nuk ruan më gjyqtarët, por përdoret për të sulmuar qytetarët në pronat e tyre,” – theksoi ai.

Sipas Bardhit, Këshilli i Lartë Gjyqësor (KLGJ) ka treguar mungesë guximi për t’u përballur me deklaratat e kryeministrit.

“KLGJ reagon vetëm kur vriten gjyqtarët, jo kur sulmohen. Siç i ‘vret’ Rama me fjalë, ashtu hesht KLGJ. Ky është realiteti i Shqipërisë më 2025,” – u shpreh ai.

Në përfundim, Bardhi paralajmëroi se nëse nuk rikthehet siguria në sallat e gjyqeve, drejtësia do të vazhdojë të ndikohet nga frika dhe presioni:

“Një gjyqtar që nuk ndihet i sigurt, nuk mund të japë drejtësi. Sot, frika po hyn në sallë bashkë me armët.”