Kanceri mbetet një nga sëmundjet me vdekshmërinë më të lartë në botë, ku llojet më të zakonshme përfshijnë kancerin e mushkërive dhe të gjirit. Sipas Institutit të Shëndetit Publik, numri i meshkujve të prekur nga kanceri është katër herë më i lartë se ai i femrave, ndërsa sëmundja mund të prekë pothuajse çdo organ: gjirin, mushkëritë, kokën, lëkurën, zorrën e trashë dhe veshkat.

Megjithatë, zemra mbetet një nga organet më të rralla për t’u prekur nga kanceri. Ekspertët shpjegojnë se arsyeja kryesore lidhet me mënyrën se si funksionojnë qelizat e saj. Ndërsa çdo qelizë e trupit ka potencialin të zhvillohet në qelizë kancerogjene për shkak të mutacioneve në ADN, qelizat e zemrës pothuajse nuk ndahen.

Mutacionet që shkaktojnë kancer ndodhin kryesisht gjatë ndarjes së qelizave, kur ADN-ja riprodhohet dhe mund të gabojë. Për shkak se qelizat e zemrës nuk formojnë qeliza të reja përveç rasteve të lëndimeve, rreziku i kancerit është jashtëzakonisht i ulët.

Ky fenomen i veçantë bën që zemra të mbetet relativisht e mbrojtur nga kanceri, duke e dalluar nga organet e tjera ku ndarja qelizore është më e shpeshtë. Ekspertët e përshkruajnë këtë si një “mbrojtje natyrore” të trupit, që e bën zemrën një nga organet më të sigurt kundër sëmundjes vdekjeprurëse.