Hakerët e lidhur me regjimin e Koresë së Veriut kanë vjedhur më shumë se 2 miliardë dollarë gjatë vitit 2025, një rekord i ri për aktivitetet kibernetike të këtij shteti, sipas raportit të publikuar nga kompania kërkimore Elliptic.

Sipas vlerësimeve të Kombeve të Bashkuara, kjo shumë përfaqëson rreth 13% të Prodhimit të Brendshëm Bruto (PBB) të Phenianit. Fondet e siguruara përmes këtyre sulmeve dyshohet se përdoren për të financuar programet bërthamore dhe raketore të regjimit.

Grupet e njohura të hakerëve, si Lazarus Group, kanë përqendruar aktivitetin e tyre kryesisht ndaj kompanive të kriptomonedhave. Sulmi më i madh i këtij viti ndodhi në shkurt ndaj platformës ByBit, ku u përvetësuan 1.4 miliardë dollarë.

Raporti i Elliptic paralajmëron se individët me pasuri të lartë janë objektiv gjithnjë e më shpesh i këtyre sulmeve, gjë që nënkupton se shifra reale e vjedhjeve mund të jetë edhe më e lartë.

Vlera totale e kripto-aseteve të vjedhura nga Koreja e Veriut ndër vite ka kaluar 6 miliardë dollarë, ndërsa vetëm në vitin 2025 janë regjistruar mbi 30 sulme të tjera që i atribuohen këtij regjimi.