Parlamenti Evropian ka miratuar një ndryshim të ri në rregulloren e Organizatës së Përbashkët të Tregjeve Bujqësore (CMO), i cili ndalon përdorimin e termave që lidhen me mishin për produktet me bazë bimore.

Me 532 vota pro, 78 kundër dhe 25 abstenime, eurodeputetët mbështetën propozimin e raportueses franceze të PPE-së, Celine Imart, që parashikon se terma si “hamburger”, “salçiçe”, “biftek” apo “eskallop” duhet të rezervohen vetëm për produktet që përmbajnë mish.

Kjo do të thotë se shprehje si “hamburger vegjetarian” apo “salçiçe tofu” nuk do të lejohen më, nëse ndryshimi final miratohet edhe nga vendet anëtare të BE-së gjatë negociatave të ardhshme.

Dokumenti përcakton se termi “mish” nënkupton vetëm “pjesët e ngrënshme të kafshëve”, ndërsa çdo përdorim tjetër për produkte bimore do të konsiderohet i pasaktë.

Megjithatë, kryetari i grupit të PPE-së, Manfred Weber, tha se ky ndryshim nuk është prioritet për grupin dhe pranoi se ka ndarje të brendshme mbi këtë çështje.

Rishikimi i rregullores CMO lidhet me përgjigjen e Komisionit Evropian ndaj protestave të fermerëve në vitin 2024, me qëllim forcimin e pozicionit të tyre në zinxhirin e furnizimit bujqësor.