Tiranë – Zëvendëskryeministrja dhe ministrja e Infrastrukturës dhe Energjisë, Belinda Balluku, ka theksuar angazhimin e Shqipërisë për forcimin e mbrojtjes kibernetike, gjatë Konferencës së NATO-s për Mbrojtjen Kibernetike, e zhvilluar në Tiranë me pjesëmarrjen e delegacioneve nga 32 vende anëtare të Aleancës.

Në fjalën e saj, Balluku nënvizoi se siguria në hapësirën dixhitale është sot një nga sfidat më të mëdha globale, dhe se Shqipëria po punon ngushtë me partnerët ndërkombëtarë për të garantuar një mjedis më të sigurt për qytetarët dhe institucionet.

“Në një botë ku rreziku vjen nga çdo cep i hapësirës dixhitale, ne nuk mund të jemi spektatorë. Duhet të jemi të përgatitur, të bashkuar dhe të fortë,” – deklaroi Balluku.

Ajo e përshkroi NATO-n si më shumë se një aleancë ushtarake, duke e cilësuar atë si një “familje solidariteti dhe bashkëpunimi” që mbron lirinë dhe paqen përmes unitetit dhe teknologjisë.

“Shqipëria është krenare që luan një rol aktiv në këtë betejë të përbashkët dhe jep kontributin e saj për sigurinë kolektive të Aleancës,” shtoi ministrja.

Konferenca e NATO-s për Mbrojtjen Kibernetike në Tiranë është pjesë e nismave të aleancës për rritjen e rezistencës ndaj sulmeve dixhitale dhe shkëmbimin e praktikave më të mira mes vendeve anëtare.