Policia e Vlorës ka finalizuar një tjetër operacion të suksesshëm në kuadër të bashkëpunimit ndërkombëtar kundër krimit të organizuar. Shtetasi Adjol Kushtaj, 38 vjeç, është vënë në pranga në lagjen “Kushtrimi”, me qëllim ekstradimin drejt Italisë, ku ishte dënuar me 10 vite burg nga Gjykata e Apelit në Firence për veprimtari kriminale në fushën e narkotikëve.

Operacioni policor, i koduar “Ombra”, u zhvillua nga Seksioni për Hetimin e Narkotikëve në bashkëpunim me Seksionin Operacional të DVP Vlorë, pas një hetimi të koordinuar me Interpol Tirana dhe autoritetet italiane.

Sipas njoftimit zyrtar, Adjol Kushtaj ishte i shpallur në kërkim ndërkombëtar që prej vitit 2023, pasi ndaj tij rëndojnë disa akuza të rënda, përfshirë:
• Kultivim të bimëve narkotike
• Prodhim dhe trafikim të lëndëve narkotike
• Krim të kryer në bashkëpunim

Pas arrestimit, Interpol Tirana dhe Interpol Roma po vijojnë procedurat për ekstradimin e tij drejt Italisë, ku do të vuajë dënimin e plotë me 10 vite burg.

Ky është një tjetër rast që tregon bashkëpunimin e ngushtë të autoriteteve shqiptare me partnerët ndërkombëtarë, në kuadër të luftës kundër trafikut të lëndëve narkotike dhe krimit të organizuar.