Buenos Aires – Kompania amerikane OpenAI, krijuesja e ChatGPT, ka nënshkruar një letër qëllimi për të ndërtuar qendrën e saj të parë të të dhënave për inteligjencën artificiale në Amerikën Latine, në Patagoninë e Argjentinës, njoftoi presidenca argjentinase.

Projekti, i quajtur “Stargate Argentina”, do të realizohet në partneritet me kompaninë lokale Sur Energy dhe parashikon një investim prej 25 miliardë dollarësh, pjesë e politikës së nxitjes së investimeve të huaja që përfshin lehtësira fiskale dhe doganore për 30 vjet.

Sipas deklaratës zyrtare, qendra do të jetë “e aftë të mbështesë gjeneratën e ardhshme të përllogaritjeve të inteligjencës artificiale” dhe pritet të ketë një kapacitet deri në 500 megavat. Vendndodhja e saktë dhe data e nisjes së punimeve nuk janë bërë ende publike.

Lajmi u bë i ditur pas një takimi të premten mes presidentit Javier Milei dhe drejtuesve të OpenAI dhe Sur Energy, duke shënuar një hap të rëndësishëm për zhvillimin e sektorit teknologjik në Argjentinë dhe Amerikën Latine.