Presidentja e Komisionit Europian, Ursula von der Leyen, gjatë një konference të përbashkët me kryeministrin Edi Rama në Tiranë, ka vlerësuar progresin e Shqipërisë në rrugën drejt Bashkimit Europian, por ka theksuar se ende nuk ka një datë konkrete për anëtarësimin.

Von der Leyen theksoi se procesi i integrimit mbetet i bazuar në merita dhe reforma reale, duke theksuar se Shqipëria ka ende punë për të bërë.
“Ne të gjithë themi me të drejtë që kushti i zgjerimit bazohet tek meritat, dhe meritat e Shqipërisë janë të dukshme. Është një proces normal i hapjes së kapitujve dhe të punuarit për reformat, në mënyrë që të bëheni pjesë e BE,” – deklaroi ajo.

Në fjalën e saj, Von der Leyen nuk la pa komentuar edhe afatet optimiste të shpallura nga kryeministri Rama, duke theksuar se ato janë “vetëm ambicie” dhe jo data zyrtare nga Brukseli.

Ky qëndrim i përsëritur nga zyrtarët europianë vjen ndërsa qeveria shqiptare vazhdon të deklarojë se anëtarësimi në BE është çështje kohe, ndërsa Brukseli kërkon më shumë rezultate konkrete në reforma, drejtësi dhe sundimin e ligjit.