Gjatë Konferencës së Kryetarëve, deputeti i Partisë Demokratike, Agron Gjekmarkaj, kritikoi me ashpërsi retorikën e përdorur nga deputetët e Partisë Socialiste në Kuvend. Ai ironizoi mbi menaxhimin e punës parlamentare, duke sugjeruar që “Kuvendi të mbyllet deri në pranverë për reflektim”.

Gjekmarkaj iu drejtua kreut të grupit parlamentar të PS, Taulant Balla, duke kërkuar që ai të kërkojë falje për një fyerje të bërë jashtë mikrofonit në Kuvend:
“Unë mendoj që secili është përgjegjës për veten, për retorikën që ndërton! Ju na thoni: fol si duhet, fol ashtu, fol kështu, fol gjatë, fol shkurt, mos bëj moral, mos bëj zhurmë… Po më duket normale që nga pala tjetër të na mësojnë se si të sillen deputetët? Kjo është çështje e secilit. Sileni nga arroganca si edukator!”

Ai shtoi se zonjat e PS-së nuk e dëgjuan fyerjen e Ballës, ndërsa ai theksoi rëndësinë e përgjegjësisë personale në Parlament:
“Të gabosh është njerëzore, të persistosh në gabim është djallëzore! Gjithë kohës jeni me dy standarde dhe zoti Balla duhet të kërkojë falje.”

Gjekmarkaj përfundoi me një apel ironik për një pushim të Kuvendit:
“Meqë jeni lodhur, sugjeroj ta mbyllni deri në pranverë këtë Parlament: pushoni, refletoni, kalon dimri, vjen pranvera, shohim e bëjmë! Nuk po bëj diversion, po konstatoj derexhenë institucionale.”

Komentet e tij kanë ngjallur reagime në sallën e Konferencës, duke rihapur debatin për komunikimin dhe etikën mes grupeve parlamentare.