Autoritetet greke kanë finalizuar një tjetër operacion të suksesshëm kundër trafikut ndërkombëtar të drogës, duke sekuestruar mbi 38 kilogramë kokainë në portin e Pireut.
Sipas policisë, droga u zbulua gjatë një kontrolli të koordinuar mes Drejtorisë për Luftën kundër Krimit të Organizuar, autoriteteve doganore dhe financiare. Në total, u gjetën 33 pako kokainë, me peshë 38.2 kilogramë, të fshehura me kujdes në mekanizmin e ftohjes së një kontejneri me 1,080 kuti bananesh. Ngarkesa kishte mbërritur me anije nga një vend i huaj, me destinacion përfundimtar portin e Pireut.
Sipas vlerësimeve paraprake, vlera e drogës në treg kap shifrën e mbi një milion eurove. Hetimet janë në vijim për të identifikuar rrjetin ndërkombëtar të përfshirë në trafik, ndërsa autoritetet greke e cilësuan këtë operacion si një goditje të rëndësishme ndaj organizatave kriminale që përdorin rrugët tregtare për transportin e drogës.
