Një studim i ri shkencor ka zgjedhur “Sofia” si emrin më të bukur në botë, duke u bazuar jo vetëm tek tingulli i ëmbël dhe harmonik, por edhe tek kuptimi dhe historia e tij e pasur kulturore.

Kërkimi u udhëhoq nga Dr. Bodo Winter, gjuhëtar në Universitetin e Birminghamit, i cili analizoi 100 emra ndërkombëtarë, duke u fokusuar te tingulli, ritmi dhe emocionet që ata përcjellin. Sipas Dr. Winter, “Sofia” dallon për kombinimin melodik të zanoreve dhe mënyrën si tingëllon e ëmbël në shumë gjuhë.

Emri rrjedh nga greqishtja e lashtë sophía, që do të thotë “urtësi”, dhe lidhet me idealet filozofike të Greqisë antike. Në mitologji, ai ka lidhje me perëndeshën Athena, ndërsa në krishterimin e hershëm lidhet me Shën Sofinë e Romës, shenjtore e njohur për qëndresën dhe besimin e saj.

Forma të ndryshme të këtij emri – Sophia, Sophie apo Sofie – njihen globalisht për elegancën dhe universalitetin e tyre, ndërsa është i lehtë për t’u shqiptuar në shumë gjuhë dhe shpesh shoqërohet me bukuri shpirtërore dhe inteligjencë.

Simbolika e emrit theksohet edhe nga monumenti Hagia Sophia në Stamboll, një thesar i arkitekturës dhe trashëgimisë botërore, që përforcon ndikimin kulturor dhe historik të këtij emri të veçantë.