Greva e urisë e naftëtarëve në Marinzë ka hyrë në ditën e pestë, ndërsa gjendja shëndetësore e 10 grevistëve vijon të përkeqësohet. Njëri prej tyre ka shfaqur simptoma viroze dhe është detyruar të kërkojë ndihmë mjekësore, ndërkohë që një tjetër ka marrë injeksion pas vizitës së ekipit shëndetësor.

Megjithatë, ende nuk ka pasur asnjë tentativë për negociata nga kompania me të cilën grevistët janë në konflikt. Jashtë godinës ku po mbahet greva, qindra kolegë të tjerë vijojnë protestën pa afat, duke bojkotuar punën.

Situata ka ndikuar direkt në prodhimin e naftës: rreth 400 puse janë pa mbikëqyrje, çka rrit rrezikun për pasoja ekonomike dhe mjedisore. Naftëtarët paralajmërojnë se nuk do të tërhiqen pa marrë përgjigje konkrete nga qeveria dhe kompania, duke e lidhur kërkesën e tyre drejtpërdrejt me mbijetesën e familjeve.