Nga rrugët e Torvaianicës deri te rrokaqiejt e Dubait, emri i Altin Sinomatit, 38-vjeçarit shqiptar i njohur si Passerotto, është bërë simbol i një realiteti të errët: eksporti i krimit dhe i turpit kombëtar.

Sipas hetimeve të karabinierëve italianë, Sinomati konsiderohet si mandanti i vrasjes së Shqiptarit Shehaj, një ekzekutim mafioz që ndodhi në shtator 2020, në plazhin e Torvaianicës, afër Romës. Për krimin, që lidhet me rivalitetet e grupeve të narkotrafikut, u paguan 150 mijë euro.

Krimi u krye në mes të ditës, në një plazh të mbushur me njerëz, duke dërguar një mesazh frike dhe pushteti. I njëjti killer kishte ekzekutuar më parë edhe Fabrizio Piscitellin, i njohur si Diabolik, kapo ultras i tifozerisë italiane, duke treguar lidhjet e errëta midis mafies shqiptare dhe botës së krimit italian.

Pas ngjarjes, Sinomati u zhduk dhe u fsheh në Dubai, një qytet që po bëhet strehë e mafies shqiptare. Pak muaj më parë, në të njëjtin vend u arrestua edhe Dorian Petoku, një tjetër figurë e njohur e botës së krimit. Sipas burimeve, edhe Arben Zogu hyn e del nga Dubai pa pengesa.

Dubai, një parajsë moderne për riciklimin e parave të drogës, armëve dhe trafikut njerëzor, shndërrohet në një qendër komande ndërkombëtare, ku drejtohen aktivitetet që po shkatërrojnë vendin tonë.

Ky arrest thekson tensionin midis drejtësisë ndërkombëtare dhe sistemit të ekstradimit, duke nxjerrë në pah sfidën e ndjekjes së figurave të krimit që operojnë në skenën globale.