Kryeministri izraelit Benjamin Netanyahu u takua këtë të hënë me emisarët amerikanë Steve Witkoff dhe Jared Kushner në Izrael, vetëm një ditë pas bombardimeve izraelite në Rripin e Gazës, të cilat vunë në provë armëpushimin e brishtë të vendosur më 10 tetor.

Sipas zëdhënëses së kryeministrit, bisedimet u fokusuan te “zhvillimet e fundit në rajon”. Witkoff, emisari i Donald Trump, dhe Kushner, dhëndri i ish-presidentit amerikan, diskutuan mbi situatën në Gaza me zyrtarët izraelitë, njoftoi ambasada amerikane.

Netanyahu pritet gjithashtu të takohet me nënkryetarin amerikan J.D. Vance, i cili do të vizitojë Izraelin së bashku me bashkëshorten e tij, Usha Vance, për disa ditë.

Duke folur para parlamentit, Netanyahu deklaroi:
“Do të diskutojmë për sfidat e sigurisë me të cilat përballemi si dhe për mundësitë diplomatike që na ofrohen. Do të kapërcejmë sfidat dhe do të shfrytëzojmë mundësitë.”

Pas bombardimeve të së dielës, që shkaktuan vdekjen e dhjetëra personave në Gaza, nënkryetari amerikan u shpreh:
“Armëpushimi ka të gjitha gjasat të sjellë paqe të qëndrueshme. Do të ketë momente të mira dhe të vështira, dhe ne duhet të vazhdojmë ta ndjekim nga afër situatën.”