Ministrja për Evropën dhe Punët e Jashtme, Elisa Spiropali, komentoi gjatë një interviste televizive gjendjen e rënduar shëndetësore të ish-kryeministrit Fatos Nano, duke theksuar rolin e tij historik në politikën shqiptare.
“Fatos Nano është një lider që për ne socialistët do të jetë gjithmonë lider. Është një pjesë e historisë shqiptare, është një pjesë që shihet dhe është i pamohueshëm. Fatos Nano është një udhëheqës që bëri më të mirën e tij në një kohë të vështirë,” tha Spiropali.
Ajo shtoi se përvojat e saj jashtë vendit, gjatë kohës që Nano ishte larguar nga qeverisja, e kanë ndihmuar ta kuptojë më mirë frymën liberale të Partisë Socialiste të asaj periudhe:
“Unë jam rikthyer pasi Fatos Nano ishte larguar nga qeverisja, pasi kam studiuar dhe jetuar në Kanada e Amerikë. Fryma liberale që ishte krijuar në PS binte ndesh me frymën e agresivitetit politik që ishte në atë kohë,” shpjegoi Spiropali.
Ministrja theksoi gjithashtu ndikimin e Nano-s në transformimin e Tiranës dhe në promovimin e ndarjes së pushtetit:
“Së bashku me transformimin e Tiranës, ky liberalizëm i Fatos Nanos dhe dëshirës për të ndarë pushtetin, ishin më së shumti që rrezatonin.”
Aktualisht, ish-kryeministri Nano ndodhet në gjendje kritike pas një ataku kardiorespirator, dhe po lufton për jetën pas 11 ditësh në reanimacion. Sipas mediave, mjekët e spitalit privat ku ai po trajtohet bëjnë të ditur se situata mbetet e rëndë. Problem kryesor konsiderohet rizgjimi i trurit, i cili ka pësuar dëmtime nga hypoksia e zgjatur gjatë arrestit kardiorespirator.
