Sipas një artikulli të prestigjiozes Bloomberg, marrëveshja e paqes prej 20 pikash që presidenti i SHBA-së, Donald Trump, ndërmjetësoi për Gazën rreth 10 ditë më parë, duket se është tashmë në vështirësi.

Michael Champion, autori i artikullit, nënvizon se pa një forcë paqeruajtëse të suksesshme, ndalimi i luftimeve do të jetë shumë i vështirë. Ai citon modelin e Kosovës, ku KFOR vijon misionin paqeruajtës prej dekadash, si shembull për t’u ndjekur.

“As Hamasi dhe as Izraeli nuk ishin të kënaqur me marrëveshjen që u detyruan të nënshkruanin, dhe tashmë militantët e Hamasit kanë dalë nga strehimet për të ekzekutuar rivalët palestinezë dhe për të rivendosur kontrollin në zonat nga të cilat forcat izraelite u tërhoqën,” shkruan Champion. Sipas tij, Izraeli thotë se Hamasi po ngrit pritë ndaj trupave të tij, ndërsa Hamasi akuzon Izraelin për bombardime të vazhdueshme.

Bloomberg thekson se struktura e planit 20-pikësh u bazua pjesërisht në një propozim nga ish-kryeministri britanik Tony Blair, ngjashëm me mënyrën sesi ai kishte ndërtuar KFOR-in në Kosovë pas 78 ditësh bombardimesh të Serbisë. Modeli i KFOR-it ka treguar se mbushja e boshllëkut të sigurisë menjëherë është kyçe për suksesin e çdo marrëveshjeje paqeruajtëse.

“Për Gazën, mësimi është i qartë: boshllëku i sigurisë duhet të mbushet menjëherë, përndryshe çdo marrëveshje paqeje është e dënuar të dështojë,” përfundon artikulli, duke nënvizuar nevojën e një forcë paqeruajtëse ndërkombëtare, e udhëhequr nga vendet myslimane si Egjipti, Azerbajxhani dhe Indonezia.