Bashkimi Europian është në prag të miratimit të lejeve të reja të drejtimit të automjeteve, një reformë që synon të unifikojë rregullat për të gjithë vendet anëtare dhe të rrisë sigurinë rrugore. Parlamenti Europian do të votojë sot për këtë nismë dhe pritet që shumica e eurodeputetëve të votojnë pro.
Ky është votimi i fundit përpara se rregullorja të hyjë në fuqi, megjithatë vendet anëtare do të kenë hapësirë veprimi kombëtare për zbatimin e saj.
“Ne kemi 20 mijë vdekje në aksidente rrugore çdo vit në BE – këto janë shumë,” – deklaroi eurodeputeti italian Matteo Ricci, i cili udhëhoqi negociatat me shtetet anëtare dhe Komisionin Europian.
Sipas tij, rregullat e reja do të bëjnë më të drejtë dhe më uniform zbatimin e gjobave dhe ndëshkimeve në të gjithë territorin e Unionit.
Një nga ndryshimet më të rëndësishme parashikon që pezullimi i patentës në një shtet të BE-së të në njihet dhe zbatohet automatikisht në të gjithë vendet e tjera. Kjo do të ndalojë praktikën ku drejtuesit e dënuar mund të vazhdonin të ngasin makinën në shtetin e tyre.
⸻
Leja digjitale e drejtimit, risia më e madhe
Një tjetër element i reformës është patenta digjitale, e cila do të jetë aksesueshme përmes smartphone-it.
“Kjo është veçanërisht e mirë për të rinjtë që kanë gjithçka në telefonat e tyre,” – u shpreh eurodeputetja Jutta Paulus.
Gjithashtu, do të aplikohet një periudhë prove dyvjeçare për drejtuesit e rinj nga mosha 17 vjeç, e vlefshme në të gjithë BE-në.
⸻
Më shumë ndërgjegjësim për sigurinë
Rregullorja e re vendos theksin edhe te trajnimi i drejtuesve të rinj, duke kërkuar vetëdijësim mbi rreziqet e “këndit të verbër” dhe përdorimin e telefonit në drejtim.
Po ashtu, do t’i jepet përparësi sigurisë së këmbësorëve, fëmijëve dhe çiklistëve në rrugë.
Një tjetër ndryshim parashikon rritjen e limitit të peshës për automjetet me sisteme alternative drejtimi, si ato elektrike.
Pas debatit të gjatë, u vendos që nuk do të ketë kontroll shëndetësor të detyrueshëm për drejtuesit e moshuar, duke lënë vendet anëtare të vendosin vetë për këtë çështje.
⸻
Kur do të hyjë në fuqi reforma
Zbatimi i rregullave do të varet nga qeveritë e vendeve anëtare, ndërsa kujtohet se edhe direktiva e parë për lejet e unifikuara të drejtimit, e miratuar në vitin 1980, hyri në fuqi vetëm pas gjashtë vitesh.
Kështu, BE hyn në një epokë të re të sigurisë dhe dixhitalizimit në drejtimin e automjeteve, ku një patentë do të vlejë për të gjithë Europën – në dorë, ose në telefon.
