Kryeministri Edi Rama, gjatë qëndrimit të tij në Londër për samitin e Procesit të Berlinit, është pyetur për marrëdhëniet e Shqipërisë me Rusinë dhe nëse ka pasur ndonjë takim me presidentin rus, Vladimir Putin. Rama e mohoi prerë:

“Jo, faleminderit! Nuk jam takuar.”

Ai shtoi se Shqipëria është një rast i veçantë në Europë, duke kujtuar se marrëdhëniet mes dy vendeve kanë qenë të ngrira gjatë historisë.

“Ne jemi i vetmi vend në gjithë Europën ku nga Kremlini nuk ka ardhur askush, dhe nga pala jonë askush nuk ka shkuar në Moskë. Kjo ka lidhje me historinë tonë… Ne i konsideronim ata si tradhtarë, të degraduar, që nuk e meritonin shoqërinë tonë. Ishim fari i vetëm i komunizmit në Europë,” tha Rama.

Kreu i qeverisë kujtoi edhe lidhjen historike me Stalin:

“Stalini ka qenë në bulevardin tonë më i gjatë se unë në bronz. Kjo krijoi një mungesë totale besimi.”

Ai përfundoi duke theksuar se Shqipëria nuk ka pasur kurrë simpati për regjimin rus aktual:

“Nuk na pëlqen Putini dhe Rusia aktuale, nuk na merr malli. Kurrë nuk jemi tunduar nga oligarkët rusë. Muzika ruse është më shumë se mjaftueshëm.”