Moderatorja Arbana Osmani ka reaguar pas valës së komenteve dhe polemikave që shpërthyen në rrjetet sociale, pasi u bë e ditur se Fero do të jetë i ftuari i radhës në podcastin e saj “Mirmëbrëma YJE”.

Në një postim në Instastory, Arbana tha se i ka lexuar të gjitha reagimet dhe se respekton mendimin e secilit, duke e parë këtë debat si një tregues vlerësimi për punën e saj.

“I kam lexuar të gjitha reagimet në rrjet në lidhje me pjesëmarrjen e Feros tek @mirembremajuve. E respektoj mendimin e secilit prej jush, dhe e marr si shenjë vlerësimi ndaj meje të gjithë këtë tymnajë; por besoj është e udhës që përpara se të gjithë të dalin në përfundime të nxituara, të dëgjojnë dhe të kuptojnë arsyen kryesore pas kësaj ftese,” – shkruan moderatorja.

Arbana u bëri thirrje ndjekësve që të ndjekin episodin e plotë përpara se të formojnë një mendim, duke theksuar se gjithçka do të sqarohet në publikimin e nesërm.

“Nesër, ora 20:00 në kanalin tim në YouTube,” – shkruan ajo, duke lënë të kuptohet se episodi do të zbulojë arsyen dhe motivin e ftesës për reperin, i cili prej kohësh është në qendër të vëmendjes për deklaratat dhe sjelljet e tij publike.