Një tjetër lëvizje politike trondit kampin blu. Manjola Nikollo, ish-kryetarja e Partisë Demokratike në Sarandë, është emëruar nënkryetare e Bashkisë Sarandë, që drejtohet nga socialisti Oltion Çaçi.

Kalimi i saj vjen menjëherë pas emërimit të ish-deputetes demokrate Zheni Gjergji në krye të Spitalit Rajonal të Elbasanit, duke shënuar një tjetër largim nga radhët e opozitës drejt mazhorancës.

Nikollo kishte dhënë dorëheqjen nga posti i kryetares së PD-së në Sarandë për të marrë pjesë në primaret e partisë, por pas humbjes u tërhoq edhe nga lista e kandidatëve për zgjedhjet e 11 majit.

Në muajt e fundit, marrëdhëniet e saj me strukturat e PD-së ishin përkeqësuar ndjeshëm. Ajo kishte akuzuar publikisht deputeten Ina Zhupa për “ndërhyrje dhe diktat” në vendimmarrjet e degës lokale, duke folur për “komplot” ndaj saj.

“Modeli im i punës nuk ka të bëjë me diktate provinciale apo intriga dinake,” – kishte shkruar Nikollo, pasi u shkarkua nga drejtimi i degës.

Sot, ish-kryetarja demokrate është pjesë e administratës së majtë, duke iu bashkuar listës së zyrtarëve që kanë braktisur PD-në për të marrë detyra në institucionet vendore të drejtuara nga Partia Socialiste.