Sekretari amerikan i Shtetit, Marco Rubio, gjatë një vizite në Izrael, deklaroi se është arritur përparim i mirë drejt zbatimit të planit amerikan për paqe në Rripin e Gazës.

Në një konferencë të përbashkët me kryeministrin izraelit, Benjamin Netanjahu, Rubio tha:

“Ne ndihemi të sigurt dhe optimistë për përparimin që po bëjmë… Jemi plotësisht të vetëdijshëm edhe për sfidat. Por Presidenti e ka kthyer këtë çështje në prioritet absolut.”

Ai shtoi se bisedimet kanë shënuar progres, por pengesat kryesore mbeten:
• Çarmatosja e Hamasit, e refuzuar kategorikisht nga grupi palestinez.
• Tërheqja e ushtrisë izraelite nga Gaza, për të cilën ende nuk ka marrëveshje.

Netanjahu u shpreh optimist dhe theksoi rëndësinë e bashkëpunimit për të kapërcyer sfidat:

“Ne duam të nxisim paqen.”

Sipas gazetës Israel Hayom, vizita e Rubio-s përfshiu diskutime mbi përbërjen e një qeverie tranzitore që parashikohet të administrojë Gazën pas përfundimit të konfliktit, ku teknokratët palestinezë do të operojnë nën mbikëqyrjen e një komiteti ndërkombëtar.

Vizita pasoi pas udhëtimit të nënpresidentit amerikan JD Vance, i cili gjithashtu theksoi se zbatimi i planit të paqes kërkon ende shumë punë.