Edhe kur ndihemi se jemi duke ngrënë “si duhet” – proteina në mëngjes, gjysmën e pjatës me perime, fruta gjatë ditës – shumë prej nesh vazhdojnë të ndihen të lodhur. Sipas dietologes Ro Huntriss, arsyeja mund të qëndrojë jo vetëm te ushqimi, por edhe te stili i jetës dhe mënyra se si trupi përpunon nutrientët.

Shkaqet kryesore dietike që mund të ndikojnë në lodhjen tuaj:
1. Mungesa e nutrientëve thelbësorë
Hekuri, magnezi dhe vitamina B12 janë të domosdoshme për prodhimin e energjisë. Pa këta nutrientë, dieta mund të duket e shëndetshme, por nuk është efektive, dhe trupi mund të ndiejë lodhje të vazhdueshme.
2. Kombinime të gabuara ushqimesh
Një smoothie vetëm me fruta mund t’ju lërë të uritur dhe të lodhur pas pak kohe. Shtimi i proteinave dhe yndyrnave të shëndetshme, si gjalpi i arrave, kos grek ose fara, ndihmon për të ruajtur energjinë gjatë ditës.
3. Orari i çrregullt i vakteve
Trupi ndjek ritmet cirkadiane dhe mund të reagojë ndryshe ndaj orareve të vakteve. Ushqimet e rënda para gjumit mund të ndikojnë negativisht në cilësinë e tij, ndërsa disa njerëz ndihen më energjikë me vakte të vogla çdo 3–4 orë.
4. Dehidratimi
Edhe dehidratimi i lehtë shkakton lodhje, dhimbje koke dhe mungesë përqendrimi. Pirja e mjaftueshme e ujit çdo ditë ndihmon në ruajtjen e energjisë.
5. Teprimi me kafeinën
Një kafe pasdite mund të japë energji të përkohshme, por konsum i tepërt çrregullon ritmin natyral të gjumit. Përfitimet e kafeinës janë të përkohshme, ndërsa lodhja mund të shtohet nëse përdoret shumë. Huntriss sugjeron të kufizohet konsumi deri në mesditë.

Edhe kur duket se dieta juaj është e balancuar, këto faktorë mund të jenë arsye pse ndiheni të lodhur. Kontrollimi i nutrientëve, kombinimi i ushqimeve, orari i vakteve, hidrimi i mjaftueshëm dhe kufizimi i kafeinës mund të bëjnë ndryshimin.

Nëse lodhja vazhdon pavarësisht ndryshimeve, konsultimi me një mjek ose dietolog mund të jetë hapi i duhur për të zbuluar shkaqe më të thella shëndetësore.