Një grabitje spektakolare ka tronditur kryeqytetin francez, pasi katër hajdutë u futën në Muzeun e Luvrit të dielën, duke vjedhur disa prej bizhuterive më të çmuara të historisë franceze.

Ngjarja ndodhi ndërsa muzeu ishte i hapur për publikun, dhe sipas autoriteteve, bëhet fjalë për një operacion të planifikuar me mjeshtëri nga një bandë profesionistësh evropianë.

100 hetues në “garë me kohën”

Një njësi speciale policore prej 100 trupash është angazhuar në operacionin për gjetjen e vjedhësve dhe rikthimin e xhevahireve, që përfshijnë objekte me vlera të jashtëzakonshme historike e financiare — ndër to, diadema e safirit e mbretëreshës Marie-Amélie, gjerdani i perandoreshës Marie-Louise, si dhe kurora e perandoreshës Eugénie, e cila u gjet më vonë e dëmtuar jashtë muzeut.

Dy persona janë arrestuar, përfshirë një burrë që po përpiqej të largohej nga Aeroporti Charles de Gaulle, në drejtim të Algjerisë. Të dy të dyshuarit janë me origjinë nga Seine-Saint-Denis, një periferi veriore e Parisit, dhe janë të njohur për policinë.

Hetim “si në filma”

Prokurorja e Parisit, Laure Beccuau, dënoi rrjedhjen e parakohshme të informacionit për mediat, duke theksuar se “zbulime të tilla mund të dëmtojnë hetimin dhe punën e 100 oficerëve të përfshirë në këtë operacion”.

Njësia speciale BRB (Brigade de Répression du Banditisme), e njohur për hetimet e saj ndaj grabitjeve të profilit të lartë, po drejton operacionin. Kjo njësi është e njëjta që hetoi grabitjen ndaj Kim Kardashian në vitin 2016, kur ajo u rrëmbye në hotelin e saj në Paris dhe iu vodhën bizhuteri me vlerë 6 milionë dollarë.

Ekspertët besojnë se hajdutët janë “një bandë kriminale me përvojë ndërkombëtare”. Sipas specialistit të sigurisë Anthony Amore, “ata janë profesionistë që veprojnë në muze e galeri të mëdha evropiane dhe e kanë planifikuar çdo detaj me kujdes”.

Çfarë po kërkon policia

Hetuesit po analizojnë pamjet e kamerave të sigurisë, të dhënat telefonike, si dhe gjurmët mjeko-ligjore të lëna në vendngjarje. Janë gjetur një motor, një targë dhe një automjet i përdorur për hyrjen në galerinë “d’Apollon”, ku ndodheshin bizhuteritë.

Detektivi i njohur Arthur Brand, i cili bashkëpunon me policitë evropiane për rikuperimin e veprave të vjedhura, deklaroi se “hetuesit po shqyrtojnë edhe pamje të vjetra për të identifikuar çdo person që mund të ketë përgjuar ekspozitën ditë më parë”.

Autoritetet franceze e kanë përshkruar këtë hetim si “një nga gjuetitë më të mëdha të njerëzve në historinë franceze”, ndërsa policia vazhdon kërkimet pa ndërprerje për të rikthyer thesaret e Luvrit në vendin ku i përkasin — zemra e historisë dhe kulturës franceze.