Një aksident trafiku me pasoja të rënda materiale ka ndodhur të dielën në Kroaci, ku një automjet me targa zvicerane është përplasur me një parmak mbrojtës pas humbjes së kontrollit nga shoferi.

Sipas policisë kroate, drejtuesi i mjetit, një 23-vjeçar i lindur në vitin 2002, po udhëtonte me shpejtësi të papërshtatshme, çka ka çuar në humbjen e kontrollit të makinës dhe përplasjen e fortë në rrugë.

Fatmirësisht, shoferi ka shpëtuar pa lëndime, por dëmet materiale vlerësohen në rreth 100 mijë euro.

Autoritetet nuk kanë bërë publike markën e automjetit, por nga fotot e publikuara në vendngjarje duket se bëhet fjalë për një makinë sportive luksoze, që ngjan me Lamborghini Huracan. Ky model është prodhuar nga viti 2014 deri në vitin 2024, me çmime që variojnë nga 160 mijë deri mbi 300 mijë euro, në varësi të versionit.

Policia po vazhdon hetimet për të përcaktuar rrethanat e sakta të ngjarjes dhe nëse në momentin e aksidentit shoferi ishte nën ndikimin e alkoolit apo substancave të tjera.