Çështja e sportistes Nayara ka kaluar tashmë kufijtë e sportit, duke u kthyer në një situatë më të gjerë dhe delikate, me dimensione njerëzore dhe shoqërore.

Në një intervistë ekskluzive për Top Channel, Nayara deklaroi se ndihet e diskriminuar, ndërsa aktualisht ndodhet e izoluar në Tiranë, me mbështetjen e psikologes të vendosur nga klubi dhe me ndihmën e vajzave të tjera të ekipit.

Edhe pse ndodhet disa mijë kilometra larg, nëna e saj, Claudia Goulart, ka kontaktuar Top Channel për të kërkuar ndihmë për vajzën e saj dhe për të shprehur shqetësimin e saj për gjendjen e Nayarës:

“Përshëndetje, jam nëna e Nayarës dhe jam shumë e kënaqur që kam vënë re se po e ndihmoni dhe mbështetni vajzën time, kjo sepse për fat të keq, unë jam shumë larg saj dhe jam mërzitur shumë që ajo po vuan.
Do të doja të kishte edhe një avokat që të merrej dhe t’i ngarkonte të gjithë përgjegjësinë atyre që po i bëjnë këtë gjë, dhe që po e bëjnë të përjetojë këtë situatë të vështirë.”

Situata e Nayarës ka ndezur diskutime mbi mbrojtjen e sportistëve dhe drejtësinë brenda klubeve sportive, duke nxjerrë në pah nevojën për mekanizma mbështetës dhe përfaqësues ligjorë që garantojnë sigurinë dhe respektin për atletët.