Kuvendi i Shqipërisë po zhvillon sot seancën e dytë plenare për këtë javë, pas asaj të së hënës, ku u prezantuan raportet e institucioneve të drejtësisë dhe u miratua ngritja e Komisioneve të Posaçme për Reformën Zgjedhore dhe Reformën Territoriale.

Në qendër të rendit të ditës është kërkesa e deputetëve të Partisë Demokratike për shkarkimin e kryetarit të Kuvendit, Niko Peleshi. Opozita e akuzon atë për shkelje të Kushtetutës dhe të Rregullores së Kuvendit, ndërsa debati për këtë çështje pritet të nisë në orën 10:00, me diskutime që parashikohen të jenë të tensionuara në sallën plenare.

Më pas, në orën 11:30, pritet të vijojë raportimi i disa institucioneve të pavarura. E para që do të marrë fjalën është kryetarja e Këshillit të Lartë të Prokurorisë, Mirela Bogdani, e cila nuk arriti të raportonte në seancën e kaluar.

Në vijim, Kuvendi do të shqyrtojë raportin vjetor për vitin 2024 të Avokates së Popullit, Erinda Ballanca, ndërsa në rendin e ditës janë përfshirë edhe raportimet nga Komisioneri për Mbikëqyrjen e Shërbimit Civil, RTSH, AMA dhe INSTAT.