Një arsenal armësh është zbuluar në Tiranë gjatë operacionit policor të koduar “The Van”, ku hetuesit kanë konstatuar se mjeti i përdorur për transportin e armëve ishte një furgon i kamufluar me logon e një kompanie ndërtimi dhe me elementë që imitonin sinjalistikën rrugore, me qëllim fshehjen e veprimtarisë së paligjshme.
Në pamjet nga vendngjarja, në xhamin ansor të furgonit shihej logoja e kompanisë “Gener 2”, ndërsa në pjesën e sipërme ishte vendosur mbishkrimi “Mirëmbajtja Rrugore”. Sipas burimeve, ky kamuflim mendohet të jetë përdorur nga trafikantët e armëve, ndërsa furgoni rezulton në emër të Eugert Sinos, tashmë i arrestuar nga policia.
Sino, i cili u mor mbrëmjen e djeshme në pyetje, ka mohuar përfshirjen në aktivitetin kriminal, duke deklaruar se nuk kishte dijeni për armët e gjetura në mjetin e parkuar pranë banesës së tij. Megjithatë, hetuesit dyshojnë se kamuflimi ishte planifikuar për të shmangur kontrollet policore.
Në brendësi të furgonit u gjetën 23 armë zjarri, përfshirë 5 snajperë, silenciatorë, municion luftarak, pajisje për shpërthime në distancë dhe uniforma të ngjashme me ato të Policisë së Shtetit.
Sipas burimeve hetimore, arsenali dyshohet se kishte ardhur nga Kosova dhe ishte destinuar për përdorim nga një grup kriminal me bazë në Tiranë, Laç dhe Burrel.
Hetuesit zbuluan gjithashtu bazën ku ruheshin armët, në të njëjtën zonë ku u kap automjeti, në Myslym Shyri. Armët janë të reja dhe nuk lidhen me rastet e mëparshme të trafikut të armëve të zbuluara. Policia po vijon punën për identifikimin e personave të tjerë të përfshirë në rrjet.
Në një deklaratë zyrtare, Drejtori i Përgjithshëm i Policisë së Shtetit, Ilir Proda, përgëzoi strukturat e Drejtorisë Vendore të Policisë Tiranë për finalizimin me sukses të operacionit, duke theksuar se:
“Ky është një tjetër operacion i suksesshëm që tregon profesionalizmin, përkushtimin dhe vendosmërinë e Policisë së Shtetit për të goditur krimin dhe garantuar sigurinë e qytetarëve. Çdo armë e paligjshme është një rrezik real për jetën e qytetarëve dhe rendin publik.”
