Autoritetet franceze kanë kryer një arrestim të tretë në lidhje me vjedhjen spektakolare në Muzeun e Luvrit, ngjarje që mediat franceze e kanë quajtur tashmë “vjedhja e shekullit”. Sipas BFMTV, arrestimi ndodhi të mërkurën në mbrëmje në Paris, dhe i dyshuari i ri mendohet të ketë qenë i pranishëm gjatë grabitjes së ndodhur më 19 tetor.

Prokuroria e Parisit konfirmoi se dy të arrestuarit e parë, të cilët u ndaluan më herët këtë javë, janë vendosur në paraburgim, pasi Gjykata vlerësoi se ekzistonin prova të mjaftueshme për përfshirjen e tyre në krim. Të tre akuzohen për “vjedhje nga një bandë e organizuar” dhe “formim të një grupi kriminal me qëllim kryerjen e një krimi të rëndë”.

Sipas burimeve hetimore, grabitja zgjati më pak se tetë minuta, dhe autorët arritën të largoheshin përpara se të ndërhynte siguria e muzeut. Prokurorja Laure Beko deklaroi se dy prej të ndaluarve e kanë pranuar pjesërisht fajësinë, duke i konsideruar ata “autorët natyrorë të grabitjes”.

I dyshuari i parë, një shtetas algjerian 34-vjeçar, u arrestua më 25 tetor në aeroportin Charles de Gaulle, pak para se të nisej drejt Algjerisë pa biletë kthimi. I dyti, 39 vjeç nga Aubervilliers, u ndalua gjysmë ore më vonë pranë banesës së tij. Autoritetet arritën t’i identifikonin falë gjurmëve të ADN-së të gjetura në skuterët dhe objektet që përdorën gjatë arratisjes.

Hetimet kanë zbuluar se të dy kishin precedent penalë për vjedhje dhe krime të tjera, ndërsa njëri prej tyre ishte nën kontroll gjyqësor për një çështje që pritet të gjykohet në nëntor.

Sipas Prokurorisë së Parisit, nga muzeu u vodhën tetë bizhuteri të kurorës franceze, me një vlerë të përllogaritur prej 88 milionë eurosh.

“Këto xhevahire janë të pamundura për t’u shitur. Kushdo që i blen, do të akuzohet për pastrim parash nga aktivitet kriminal,” – tha prokurorja Beko.

Ndërkohë, policia franceze po heton nëse pas grabitjes fshihet një rrjet më i gjerë ndërkombëtar, megjithatë nuk ka ende prova për përfshirjen e ndonjë punonjësi të muzeut.

Hetimet vazhdojnë, ndërsa xhevahiret e vjedhura mbeten ende të zhdukura, duke mbajtur të gjallë misterin e një prej grabitjeve më të bujshme në historinë moderne të Francës.