Deputetja e PS-së, Romina Kuko, ngriti alarmin gjatë seancës plenare të enjtes, 30 tetor, duke paralajmëruar rrezikun që u kanoset të miturve nga shitja e pijeve alkoolike dhe cigareve pranë shkollave dhe duke kërkuar ndërhyrje urgjente nga institucionet.

“Kur fëmija del nga shkolla dhe përballet me një market që i shet cigare, apo një lokal që i shërben alkool, ai nuk është i sigurt, por është i ekspozuar. Kam një pyetje të drejtëpërdrejtë për ata që e bëjnë këtë: Kush mendoni se jeni ju që helmoni fëmijët dhe nuk keni frikë? Cili ligj ju mbron që i shërbeni 15-vjeçarëve gota alkooli për fitim? Asnjë ligj!”, tha Kuko.

Ajo bëri thirrje të menjëhershme për ndërhyrje nga Policia e Shtetit, Inspektoriati i Tregut dhe shëndetësia, duke kërkuar kontrollin e çdo lokali apo marketi pranë shkollave dhe ndëshkimin e çdo forme abuzimi.

“Por kjo nuk është vetëm detyrë e institucioneve, është detyrë qytetare. Ndaj i bëj thirrje çdo prindi, çdo qytetari, çdo dëshmitari: Nëse shihni një lokal që u shërben të miturve pije alkoolike, nëse një market i shet cigare fëmijëve, raportoni dhe mos e ktheni kokën. Bëhemi bashkëfajtorë nëse heshtim,” përfundoi Kuko.

Deputetja e PS-së theksoi se veprimi i menjëhershëm është i domosdoshëm për të mbrojtur shëndetin dhe sigurinë e fëmijëve në mjediset e shkollave.