Drejtoresha e Përgjithshme e Institutit të Statistikave (INSTAT), Elsa Dhuli, deklaroi sot në Kuvend gjatë prezantimit të raportit vjetor për vitin 2024 se Shqipëria ka arritur progres të dukshëm në rritjen e numrit të të dhënave, cilësinë dhe zgjerimin e gamës së informacionit statistik.

Dhuli theksoi se sistemi kombëtar statistikor ka përmbushur objektivat e miratuara nga Kuvendi për periudhën 2022-2026 dhe ka përballuar sfida të rëndësishme, përfshirë hapjen e negociatave për kapitullin 18, “Statistikat”.

Ajo vuri në dukje se publikimi i rezultateve finale të censit të banesave dhe popullsisë 2023 u realizua shpejt dhe ofroi informacion të detajuar mbi ndryshimet demografike, treguesit socialë dhe ekonomikë, si dhe kushtet e jetesës dhe banimit, duke ndihmuar në planifikimin e shkollave, spitaleve dhe njësive të tjera të shërbimit.

Dhuli shtoi se viti 2024 shënoi 100-vjetorin e statistikave zyrtare, dhe pavarësisht ngadalësimit për shkak të një sulmi kibernetik në shkurt, INSTAT ka punuar për të ruajtur paanshmërinë dhe qëndrueshmërinë e të dhënave.

Në raport u përmendën gjithashtu tre rekomandime kryesore të zbatuara: përpunimi cilësor i të dhënave të censit, forcimi i bashkëpunimit me AKSK dhe eficienca e plotë e faqes së INSTAT.

Dhuli bëri me dije se sistemi kombëtar statistikor u zgjerua duke përfshirë Agjencinë Kombëtare të Burimeve Natyrore për statistikat energjetike dhe se Shqipëria bashkëpunon me 22 institucione, universitete dhe qendra studimore. Në vitin 2024, numri i të dhënave në databazën evropiane u rrit me 32%, nga 5.3 milionë në 7 milionë datapoint, ndërsa 37% e të dhënave u grumbulluan me mjete elektronike, duke treguar avancim të dukshëm në mbledhjen dhe përpunimin e statistikave.