Ukraina ka shënuar një tjetër bilanc të rëndësishëm në luftën kundër agresionit rus. Kreu i Shërbimit të Sigurisë së Ukrainës (SBU), Vasyl Malyuk, deklaroi sot se forcat ukrainase kanë goditur me sukses 160 objekte të naftës dhe energjisë në territorin rus që nga fillimi i këtij viti.

Në një prononcim për mediat, Malyuk theksoi se sulmet ndaj infrastrukturës energjetike të Rusisë do të vazhdojnë, me qëllim që të dobësohet aftësia e Kremlinit për të financuar luftën në Ukrainë.

“Ne do të vazhdojmë të godasim. Çdo objekt i shkatërruar i naftës do të thotë më pak para për raketa e tanke që përdoren kundër qytetarëve tanë,” – u shpreh kreu i SBU-së.

Ai shtoi gjithashtu se Ukraina ka shkatërruar një nga raketat ruse me rreze të mesme veprimi, të tipit Oresnik, gjatë një operacioni të veçantë në verën e vitit 2023.
Sipas Malyuk, operacioni është realizuar në bashkëpunim mes SBU-së, Shërbimit Ushtarak të Inteligjencës (GUR) dhe Shërbimit të Inteligjencës së Jashtme, duke e cilësuar si “100% të suksesshëm”.

Deklarata e tij vjen në një kohë kur Ukraina ka intensifikuar operacionet kundër objektivave strategjike në thellësi të territorit rus, duke synuar të paralizojë sektorin energjetik dhe logjistik të Moskës, një ndër shtyllat kryesore të ekonomisë dhe luftës ruse.