Shkup – Qytetarët e Maqedonisë së Veriut iu drejtuan kutive të votimit të dielën për rundin e dytë të zgjedhjeve për kryetarë komunash, ku ishin përfshirë 33 komuna. Të drejtë vote kishin mbi një milionë qytetarë, ndërsa procesi u zhvillua i qetë dhe pa incidente që të cenonin sigurinë e zgjedhjeve.

Me 87% të votave të numëruara, VMRO-DPMNE, partia në pushtet, ka fituar 19 komuna, duke u pozicionuar kryesore. Pas saj renditet LSDM, e majta maqedonase, me 4 komuna të fituara.

Nga koalicionet shqiptare, VLEN ka fituar 5 komuna në të cilat garonte, ndërsa Aleanca për Integrim e udhëhequr nga BDI ka dalë fituese në një komunë nga pesë ku garonte. Po ashtu, Uniteti rom dhe Lëvizja ZNAM kanë fituar nga një komunë secila.

Raundi i dytë i zgjedhjeve pasqyroi një proces pa tensione dhe konfirmoi vazhdimësinë e garës politike në nivel lokal në vend.