Një tragjedi e rëndë ka tronditur Brazilin, pasi një grua 28-vjeçare humbi jetën pas një plumbi qorr gjatë një përleshjeje midis bandave kriminale në Rio de Janeiro.
Barbara Elisa Yabeta Borges, punonjëse banke dhe blogere udhëtimesh, u qëllua për vdekje teksa ishte ulur në sediljen e pasme të një taksie, pranë urës Fundão në zonën veriore të qytetit.
Sipas shoferit të taksisë, gjithçka ndodhi në pak sekonda:
“Dëgjova një krismë, kështu që shtova shpejtësinë dhe i thashë të zbriste. Pashë që ishte qëlluar… ajo po përpiqej të merrte frymë. Ishte e tmerrshme, sikur një bombë të kishte shpërthyer në makinën time,” – ka rrëfyer ai për The Sun.
Barbara u dërgua me urgjencë në Spitalin Geral de Bonsucesso, por mjekët nuk mundën ta shpëtonin jetën.
Policia ka mbërritur menjëherë në vendngjarje dhe ka konfiskuar një pushkë, karikatorë dhe municione, duke konfirmuar se ngjarja ndodhi gjatë një shkëmbimi zjarri mes bandave rivale.
Vdekja e të resë vjen vetëm pak ditë pas një operacioni masiv policor në favela, ku humbën jetën të paktën 100 persona, duke e shtuar më tej tensionin në qytetin e njohur për dhunën e vazhdueshme të bandave.
