Policia e Kosovës ka arrestuar dy persona, K.C. (28) dhe Z.M. (42), të dyshuar për një rast grabitjeje që ndodhi në rrugën “Dervarska” në Mitrovicë të Veriut.
Sipas njoftimit zyrtar, dy të dyshuarit kishin hyrë me forcë në një lokal dhe kishin vjedhur një shumë parash.
Njëri prej tyre u ndalua në vendngjarje nga punëtorët e një kompanie sigurie fizike, ndërsa tjetri u kap më vonë nga njësitë policore.
Gjatë kontrollit, policia ka gjetur dhe sekuestruar një shumë parash, që dyshohet të jetë produkt i grabitjes. Hetimet paraprake kanë ngritur dyshime se të njëjtit persona mund të jenë të përfshirë edhe në dy raste të tjera të vjedhjeve të ndodhura në ditët e fundit.
Njëri nga të arrestuarit ka pranuar përfshirjen në këto ngjarje gjatë fazës së intervistimit.
“Të gjitha veprimet hetimore janë kryer në koordinim me Prokurorin e Shtetit, i cili ka urdhëruar ndalimin e tyre për 48 orë,” – thuhet në njoftimin e Policisë së Kosovës.
Ndaj të dyshuarve është inicuar rasti “Vjedhje e rëndë”, ndërsa hetimet po vazhdojnë për të zbardhur nëse janë të përfshirë në ndonjë ngjarje tjetër të ngjashme në zonë.
