Kryeministri Edi Rama ka reaguar për herë të parë pas vendimit të Gjykatës Kushtetuese, e cila riktheu Erion Veliajn në detyrë si kryebashkiak i Tiranës.

Në një postim në platformën X, Rama shkruan se vendimi tregon se nuk i ka nën kontroll të gjitha pushtetet, dhe këtë e sheh si një gjë pozitive për demokracinë:

“Ja që edhe njëherë u provua se nuk i paskam kapur unë të tëra pushtetet, dhe kjo është një gjë sa e qartë, aq edhe e mirë apo jo?”

Ai shton se nëse Tirana nuk do të ketë zgjedhje deri në vitin 2027, dhe nëse Gjykata Kushtetuese vendos se kryebashkiaku i burgosur nuk mund të largohet përveçse me zgjedhje, atëherë:

“Disproporcioni i mbajtjes së tij në qeli nuk është më vetëm dëm për të drejtat e tij kushtetuese, por edhe për të drejtën e qytetarëve të Tiranës për t’u shërbyer nga i zgjedhuri i tyre.”

Rama thekson se e sheh këtë vendim si një akt parimor, jo si një qëndrim kundër qeverisë, dhe shpreson që e njëjta logjikë të zbatohet edhe për paraburgimin e Veliajt:

“Nuk ka si të mos presim që me të njëjtën parimësi, kur të gjykohet paraburgimi i tij, Kushtetuesja ta kthejë Erion Veliajn në detyrë për të vijuar procesin gjyqësor në gjendje të lirë, apo jo?”

Në përfundim, kryeministri bën thirrje për zgjidhjen e ngërçit absurd, duke theksuar se “kryeqyteti nuk mund të trajtohet si jetim për vite me radhë.”