Ngjarja e rëndë që tronditi Beratin, ku 42-vjeçari Keli Hoxha u vra me thikë në Kalë, merr një dimension tragjik pas rrëfimit të bashkëshortes së tij, Vjola Haxhia. Ajo përshkruan me dhimbje momentet e fundit të jetës së bashkëshortit, i cili u godit nga Kristo Mema pas një debati të çuditshëm mbi një kalë.

“Ne vizituam kalanë me familjen dhe nënën e bashkëshortit. Vajza jonë 8-vjeçare pa një kalë të lidhur dhe kërkoi ta prekte. Keli iu afrua bashkë me të, pa e ditur që pronari do të shfaqej i tërbuar. Burri im i tha qetë: ‘Mos u shqetëso, kam pasur kuaj, di si t’i trajtoj’”, rrëfen Vjola.

Sipas saj, autori filloi një debat me tone ofenduese dhe vulgare.

“Bashkëshorti im i tha: ‘Je në moshën e gjyshit tim, nuk merrem me ty’. Kur po largoheshin, autori e pështyu tri herë dhe e ofendoi rëndë. Keli u kthye, por në sekondë ai e goditi me thikë. Më tha: ‘Shpirt, njofto ambulancën, më vrau me thikë’, dhe ra në tokë i mbuluar me gjak”, shton bashkëshortja.

Vjola Haxhia thekson se ngjarja ndodhi para dhjetëra turistëve, duke mohuar versionet që qarkullojnë në media se sherri kishte nisur për shkak të një fotografie me kalin.

“Ne jetojmë në Angli dhe ishim me pushime. Keli nuk bëri asnjë foto, nuk kishte arsye për konflikt. Fëmijët e mi janë në shok – nuk flenë, nuk hanë, nuk flasin. Shteti duhet të interesohet për ta, jo të heshtë”, përfundon ajo.

Ngjarja ka tronditur komunitetin lokal dhe ka hapur debate mbi sigurinë në zonat turistike, ndërsa familjarët kërkojnë drejtësi për humbjen e parakohshme të Keli Hoxhës.