Një shtetas shqiptar është arrestuar si pjesë e grupit që dhunoi dhe grabiti biznesmenin italian Eugenio Gallizioli, pronar i kompanisë tekstile Manifatture Lombarde, në vilën e tij në Trento natën midis 7 dhe 8 tetorit.

Të ndaluarit e mëparshëm janë Klodjan Cesku, 31 vjeç, dhe Arsild Memaj, 21 vjeç, të dy gjithashtu shqiptarë. Arrestimet u kryen mes Trentos dhe Milanos, ndërsa bashkëpunëtori i katërt i dyshuar u mbajt në gjendje të lirë.

Hetimet zbuluan se grabitësit hynë në vilë përmes një dritareje dhe mbajtën 72-vjeçarin Gallizioli rob për mbi katër orë, duke e detyruar me armë zjarri dhe thikë të tregonte vendin e kasafortës. Kur biznesmeni refuzoi të japë kombinimin, dy hajdutët u larguan me makinën e tij drejt kantierit të ndërtimit ku punonte një prej tyre, ku vodhën pajisjen për hapjen e kasafortës.

Plaçka, që përfshin 300 mijë euro cash dhe bizhuteri ari, ende nuk është rikuperuar, ndërsa pamjet e kamerave të sigurisë kanë ndihmuar në identifikimin e të dyshuarve.

Klodjan Cesku është dërguar në burgun Spini di Gardolo, Arsild Memaj në burgun e Milanos, dhe i treti në Verona, të gjithë në pritje të gjyqit. Avokati i biznesmenit, Andrea de Bertolini, falenderoi Karabinierët për profesionalizmin dhe shprehu shpresën që të gjitha të vjedhurat të rikuperohen së shpejti.