Presidenti i Republikës, Bajram Begaj, mori pjesë në Samitin e Dytë Botëror për Zhvillimin Social të organizuar nga OKB në Doha, Katar, një ngjarje që mblodhi udhëheqës botërorë me qëllim promovimin e drejtësisë sociale dhe luftën kundër pabarazisë.

Gjatë fjalës së tij, Presidenti Begaj theksoi se Shqipëria, në procesin e përparimit drejt anëtarësimit në Bashkimin Evropian, e sheh samitin si një platformë për të përafruar politikat sociale kombëtare me standardet ndërkombëtare. Ai përmendi reformat në shëndetësi, arsim, punësim dhe mirëqenie, si dhe digitalizimin e shërbimeve publike që i ka bërë institucionet më të qasshme dhe transparente për qytetarët.

Kreu i shtetit shtoi se OKB-ja ka vlerësuar përkushtimin e Shqipërisë për barazinë gjinore dhe përfshirjen sociale. Megjithatë, ai theksoi nevojën për të adaptuar sistemet sociale ndaj tranzicioneve digjitale, demografike dhe mjedisore, duke kapërcyer hendekun digjital dhe fuqizuar komunitetet rurale.

Presidenti Begaj përfundoi fjalën me një thirrje për bashkëpunim ndërkombëtar:

“Le të punojmë bashkërisht për ta shndërruar këtë samit në një pikë kthese për të vendosur njerëzimin në zemër të zhvillimit.”

Ky samit shënon një mundësi të rëndësishme për Shqipërinë që të riafirmojë angazhimin e saj ndaj zhvillimit social të qëndrueshëm dhe gjithëpërfshirës.