Detaje të reja janë zbuluar nga dosja e SPAK për tenderin e tunelit të Llogarasë, një prej projekteve më të mëdha infrastrukturore në vend. Hetimet tregojnë se ministrja e Infrastrukturës, Belinda Balluku, ka pasur ndikim të drejtpërdrejtë në momentin e shpalljes së fituesit, duke komunikuar në kohë reale me ish-drejtorin e Autoritetit Rrugor Shqiptar, Evis Berberin.

Sipas dosjes hetimore, komunikimi është kryer përmes aplikacionit “Signal”, ku Balluku i kërkon Berberit të presë me publikimin e rezultatit deri në një sinjal nga ajo.

Në datën 1 tetor 2021, Berberi i shkruan ministres:

“Ok, për pak nxjerr tunelin.”

Balluku i përgjigjet:

“Prit dhe pak.”

Kur Berberi pyet nëse bëhet fjalë për tunelin, ministrja konfirmon:

“Po po, prit t’i çoj fjalën atij kurvës që më kërcënon me sms.”

Pas disa minutash, Balluku i dërgon mesazhin përfundimtar:

“Nxirre tunelin.”

Menjëherë pas kësaj, Berberi i raporton:

“Tuneli u nxorr sapo.”

Sipas burimeve nga grupi hetimor, ky komunikim tregon se vendimi për shpalljen e fituesit nuk ishte marrë në mënyrë të pavarur nga Komisioni i Vlerësimit të Ofertave, por u diktua nga vetë ministrja.

Prokuroria e Posaçme dyshon se Balluku dhe Berberi kanë konsumuar veprën penale të “shkeljes së barazisë në tenderë” dhe “ndikimit të paligjshëm ndaj funksionarëve publikë”, duke ushtruar kontroll të paligjshëm mbi procesin e vlerësimit.

Hetimi për tenderin e tunelit të Llogarasë, me vlerë mbi 140 milionë euro, pritet të jetë ndër çështjet më të bujshme që do të shqyrtohen nga SPAK gjatë muajve në vijim.