Detaje të reja nga dosja e SPAK zbulojnë komunikime të tjera mes zv.kryeministres Belinda Balluku dhe ish-drejtorit të Autoritetit Rrugor Shqiptar, Evis Berberi, në lidhje me tenderin e tunelit të Llogarasë.
Sipas dokumenteve hetimore, Balluku ka ftuar Berberin në banesën e saj më 29 gusht 2021, vetëm një ditë para se në Tiranë të mbërrinin përfaqësuesit turq të kompanisë që më pas fitoi tenderin.

Në bisedat e siguruara nga aplikacioni “Signal”, Berberi duket se ka keqkuptuar orarin e takimit, duke u paraqitur që në mëngjes, ndërsa ministrja i kujton me ton të afërt:

“Në darkë o zemër.”

Pas kthimit nga udhëtimi në Vjenë, Balluku e udhëzon më vonë vartësin me një tjetër mesazh:

“Po futem në garazh, hajde lart më mirë, shkalla H.”

Të nesërmen, më 30 gusht 2021, komunikimet mes tyre tregojnë se Berberi ishte në takim me tre përfaqësues të kompanisë turke “Intekar-ASL”, e cila në muajt pasues u shpall fituese e tenderit.
Në orën 12:08, Balluku e pyet:

“Ke kanë me vete?”

Berberi i përgjigjet:

“Vetëm tre turqit.”

Balluku e mbyll me një “OK”.

Sipas të dhënave të sistemit TIMS, shtetasit turq Ayhan Altun dhe Çagri Silahtaroglu kanë hyrë në Shqipëri më 29 gusht dhe janë larguar më 30 gusht 2021, pak orë pas takimit me zyrtarët shqiptarë.

Këto komunikime, të përfshira në dosjen hetimore të SPAK, shtojnë dyshimet se procesi i tenderimit për ndërtimin e tunelit të Llogarasë është ndikuar nga nivelet më të larta politike, ndërsa marrëdhënia e afërt mes Ballukut dhe Berberit ka luajtur një rol kyç në koordinimin e veprimeve përpara shpalljes së fituesit.