Kreu i SPAK, Altin Dumani, i ftuar në emisionin “Trialog” me Alba Alishanin, u pyet drejtpërdrejt nëse kishte refuzuar një takim me kryeministrin Edi Rama.

Dumani nuk dha një përgjigje të drejtpërdrejtë, duke theksuar se takimet e SPAK-ut me përfaqësues të pushteteve të tjera janë gjithmonë institucionale dhe proceduriale, dhe se takime të tjera jashtë këtij formatit nuk ka pasur.

Gazetarja e pyeti më tej për një përballje fizike me kryeministrin, por Dumani përsëriti të njëjtin qëndrim, duke mos dhënë asnjë detaj shtesë.

Pyetje: “Keni refuzuar një takim me kryeministrin? A është refuzuar nga ana juaj një takim me Edi Ramën?”
Altin Dumani: “Takimet e drejtuesit të SPAK me përfaqësues të pushteteve të tjera janë proceduriale dhe institucionale. Takime të tjera, tej këtij formati, nuk kam pasur dhe nuk kam asnjë.”

Deklarata e tij vjen në një kohë kur marrëdhëniet mes SPAK-ut dhe ekzekutivit janë nën vëmendje, pas hetimeve që prekin struktura të larta të administratës dhe politikës në vend.