Komisionerja për Zgjerimin, Marta Kos, ka reaguar pas komenteve të ish-kryeministrit Sali Berisha ndaj ambasadorit të Bashkimit Europian në Shqipëri, Silvio Gonzato, për orientimin e tij seksual.

Kos thekson se çdo sulm është i papranueshëm dhe nënvizon se deklaratat e Gonzatos për barazinë gjinore dhe mosdiskriminimin nuk janë opinione personale, por pjesë integrale e legjislacionit të BE-së.

“Barazia gjinore dhe mosdiskriminimi janë pjesë integrale e ligjit të BE-së. Përputhja me të është pjesë e procesit të anëtarësimit në BE. Kjo nuk është një kërkesë personale e ambasadorit të BE në Shqipëri. Çdo sulm ndaj tij është i papranueshëm,” shkruan Kos.

Ky reagim vjen në një moment kur procesi i anëtarësimit të Shqipërisë në Bashkimin Europian është në fokus, duke theksuar rëndësinë e respektimit të standardeve të ligjit dhe barazisë gjinore.