Në seancën e sotme plenare të Kuvendit, kreu i Partisë Demokratike, Sali Berisha, u përplas me deputetin Toni Gogu lidhur me përdorimin e termit “binare” në diskutimin mbi barazinë gjinore.

Berisha e mohoi se kishte diskriminuar dikë për orientimin seksual dhe e shpjegoi përdorimin e termit:
“Së pari injoranca nuk është kurrë argument, parafolësi më duket fjalën binar e ngatërron me bipolar. Binar quhet burri dhe gruaja, gjini binare do të thotë mashkull dhe femër, ti që ngrihesh dhe thua që kjo është fyerje, duhet të ndihesh keq për veten tënde. Është e turpshme, nuk e bën as një nxënës i klasës së katërt,” tha Berisha.

Deputeti Toni Gogu reagoi: “Nëse je diskriminues në thelb.”

Berisha iu përgjigj: “Pse e diskriminova se i thash binar? Asnjë diskriminim, i thash binar, kjo nuk mund të jetë fyerje kurrë. Unë jam autori i një ligji që dënon diskriminimin për orientimin seksual. Por qenka binar sipas teje fyerje.”

Gogu e kundërshtoi: “Po ua shpjegoj, po të doni jua lexoj. E keni stigmatizuar për orientimin seksual.”

Debati nxiti tensione të dukshme mes dy deputetëve dhe riktheu vëmendjen tek përdorimi i terminologjisë gjinore dhe konceptet e barazisë në Kuvend.